Jun 10, 2018

இசைவோம்.. இசையாவோம்.. இளையராஜாவினால்..! – 4


courtesy: indiaglitz

சோகமும் ஒரு சுகமான உணர்வுதான் என்று சொன்னால், இன்றைய தலைமுறையின் உடல் அழுத்தம் ஏகத்துக்கும் எகிறும். அந்தச் சொல்லில் இருந்து விலகியிருக்கக் கற்றுக்கொடுத்ததாலேயே, இன்று அவர்களுக்குத் தோல்வியை எதிர்கொள்ளும் பக்குவம் குறைந்துவிட்டது என்று தோன்றுகிறது. எப்போதும் துள்ளல் இசையைக் கேட்பவர்களுக்கு, மெலடி மெட்டு கூட சோக கீதமாகத் தான் தென்படுகிறது. இப்படிப்பட்ட சூழலுக்கு நடுவே, இன்றைய எம்பி3 யுகத்திலும் சில அங்கிள்கள் மற்றும் ஆண்டிகளின் மனதில் சோக கீதங்கள் தொகுப்புகளுக்கான மவுசு மங்காமல் இருக்கிறது. 

ஏ.ஆர்.ரஹ்மான் படங்களிலும் சோகமான ராகங்கள் உண்டென்றாலும், அதற்கு முந்தைய காலகட்டம் தான் சோகம் பாட தோதான களம் அமைத்துக் கொடுத்தது என்பதே உண்மை. சோக ராகங்கள் என்று இசைத்தட்டு வெளியிடும் அளவுக்கு, தமிழ் திரையிசையில் சோகத்தை இசைக்கும் கீதங்களின் எண்ணிக்கை மிக அதிகம். வேலையில்லாத் திண்டாட்டமும் கலப்புத் திருமணத்தை நோக்கி நகரமுடியாததால் உண்டான காதல் தோல்விகளும் நியாய தர்மங்கள் மீதான உடைப்புகளும் பெருகிய காலகட்டத்தில், இந்த சமூகத்தின் சோகமும் அதீதமாகவே இருந்திருக்கும். 

courtesy - google god
உள்ளும் புறமும் ஒரே உணர்வைப் பெறும் வகையில், சோகத்தைப் பிரதிபலிக்கும் கலையம்சங்கள் கொண்டாடப்படும் வாய்ப்புகள் பெருகியிருந்த நேரம். அதனால், சினிமாவின் திரைக்கதையிலும் இசையிலும் சோகம் கண்டிப்பாக இடம்பெற வேண்டுமென்ற நியதி இருந்ததில் தவறேதுமில்லை. இதன் காரணமாக, 80களிலும் 90களிலும் வெளியான பெரும்பாலான படங்களில் ஆண் அல்லது பெண் கதாபாத்திரங்கள் சோகமாகப் பாடும் ஒரு பாடல் கண்டிப்பாக இடம்பிடித்தது. 

இந்த விஷயத்திலும் இளையராஜா ஒரு வித்தகர். சுகமான ராகத்தில் டூயட் பாடலைத் தந்துவிட்டு, அதிலுள்ள தாள அமைப்பையும் பாடல் வரிகளையும் சற்றே மாற்றி சோக ராகத்தைப் பிழிந்துவிடுவார். 80களில் வந்த அவரது ஏராளமான பாடல்களை இதற்கு உதாரணம் காட்டலாம். இதுபோக, எஸ்.ஏ.சி. போன்ற இயக்குனர்கள் ஒரு போர்வையைப் போர்த்திக்கொண்டு வந்து நாயகனுக்கும் நாயகிக்கும் புத்தி போதித்த பாடல்களும் உண்டு. தாய்ப்பாசத்தை நினைவிலிருத்தி வருந்தும் பாடல்களும் உண்டு. இளையராஜாவின் படங்களில், இம்மாதிரிப் பாடல்களை அவரே பாடிவிடுவார். அவை தனித்தொகுப்பாக வெளிவந்துள்ளன என்பது தனிக்கதை.


‘நான் தேடும் செவ்வந்திப் பூவிது’ என்று டூயட் பாடினாலும், நம்மாளுங்களைப் பொறுத்தவரை சோக இசைக்கு எப்போதும் இளையராஜாவின் குரலே சாலப்பொருத்தம். அவரது குரலில் இருக்கும் கரகர தன்மையும், அடிநாதமாக இருக்கும் பூடகத்தன்மையும் கூட இதற்குக் காரணமாக இருக்கலாம். இப்படிப்பட்ட இளையராஜா, சோகமே அடிநாதமான திரைக்கதைகளுக்கு எப்படி இசையமைத்திருப்பார். இதற்கொரு சரியான உதாரணம் 1982ல் வெளிவந்த ‘ஈரவிழி காவியங்கள்’ திரைப்படம் என்று தோன்றுகிறது. பெயருக்கேற்றாற்போல, இந்தப் படத்தின் சுகமான ராகங்களிலும் சோகம் எட்டிப்பார்ப்பது எனக்கு மட்டும்தானா என்று தெரியவில்லை. (மற்றவர்கள் கேட்டுவிட்டு, தங்களது கருத்தைப் பகிரலாம்.)

ஈரவிழி காவியங்கள் படத்தில் பிரதாப் போத்தன், ராதிகா, வெண்ணிற ஆடை மூர்த்தி, கமலா காமேஷ் உட்படப் பலர் நடித்திருக்கின்றனர். ஜெயா மூவிஸ் தொலைக்காட்சியில் அவ்வப்போது திரையிடப்படும் என்றாலும், இதுவரை இந்தப் படத்தை முழுமையாகப் பார்க்கவில்லை. ஆனால், இந்த படத்தின் காட்சியமைப்பில் அதீத யதார்த்தம் தென்பட்டதாக உணர்ந்திருக்கிறேன். 

படத்தின் இயக்குனர் என்று பி.ஆர்.ரவிஷங்கர் என்ற பெயரைக் காட்டுகிறார் கூகுள் ஆண்டவர். படத்தின் ஒளிப்பதிவு நம்ம அசோக்குமார். இவரது பெயரைப் பார்த்ததும், படத்தில் நிரம்பியிருந்த யதார்த்தம் ஆச்சர்யத்தில் இருந்து கீழிறங்கி வெகு சாதாரணமாகிப் போனது. கண்டிப்பாக, இது அவருக்கான புகழ்மாலைதான். 

இந்தப் படத்தின் பாடல்கள், கேட்டவுடன் பச்செக்கென்று மனதில் ஒட்டிகொண்டது. காரணம், இந்தப் படத்தின் அனைத்துப் பாடல்களும் அந்த காலகட்டத்து இசைத்தன்மையிலிருந்து விலகியிருக்கின்றன. அன்றைய இசை ரசிகர்களுக்கு, ட்ரெண்டுக்கு மாறாகப் புதுவித அனுபவத்தைக் கண்டிப்பாகத் தந்திருக்கும் இந்த பாடல்களின் ஒலிப்பு. 

தனக்கேயுரிய லாலாலாலா.. முனகலுடன் இளையராஜா பாடும் ‘தென்றலிடை தோரணங்கள் தோலினிலே கூந்தலலை’ பாடல் கேட்கும்போது அற்புதமான உணர்வைத் தருகிறது. இரண்டு நிமிடப் பாடலுக்கும் முன்னிசை, இடையிசை என்று பிரமாதப்படுத்தியிருக்கிறார் ராஜா. இதனை எழுதியவர் எம்.ஜி.வல்லபன் என்று சொல்கிறார் கூகுள் ஆண்டவர். இந்தப் படத்தில் இதேபோல இன்னும் இரண்டு குறும்பாடல்கள் உண்டு.

‘பழைய சோகங்கள்’ பாடல் தொடங்கும்போது அற்புதமான மெல்லிசையுடன் தொடங்குகிறது. அதற்கு மாறாக, ’பழைய சோகங்கள் அழுத காயங்கள்’ என்ற வார்த்தைகளைத் தாண்டி, பாடலுக்கு அதீத சோகத்தைக் கொடுப்பது இளையராஜாவின் தனித்தன்மை. இதில் இளையராஜாவின் குரல் இடைவிடாமல் ஒலிக்கும்போது, பின்னணியில் கிடார் இசையும் கீபோர்டு இசையும் மெலிதாக ஒலிக்கும். இடையிசையின்போது அது புதிய தளத்துக்கு மேலேறும். இந்தப் பாடலை எழுதியவர் வைரமுத்து. பாடலின் இடையில் ‘ரகசிய ரணங்களோ’ என்ற வார்த்தையை உச்சரிக்கும்போது ராஜாவின் குரலில் இருக்கும் ஏற்ற இறக்கம், அவர் எந்த அளவுக்கு இந்தப் பாடலை ரசித்து இசையமைத்திருக்கிறார் என்பதைச் சொல்லாமல் சொல்லும்.

’காணும் சந்தோஷம் யாவும் பொய்வேஷம்’ பாடல் இளையராஜாவின் குரலில், கூடுதல் துயர் தாங்கி ஒலிக்கும். இந்த குறும்பாடலிலும் மெலிதான இசையை மட்டுமே முன்னும் பின்னும் ஒலிக்கவிட்டிருப்பார் ராஜா. தனி ஆல்பங்களுக்குப் புதுவித இசையைத் தருவேன் என்று இன்றைய இசையமைப்பாளர்கள் சொல்லிவரும் சூழலில், தனது வேறுபட்ட இசையார்வத்தை வெளிப்படுத்த ஒரு படத்தின் களத்தைப் பயன்படுத்தியிருப்பது நிச்சயம் ராஜாவின் தனித்தன்மைதான்.
courtesy - google god
தன்னம்பிக்கை மிளிரும் பாடலில் கூட, மனதில் ஓரத்தில் ஒட்டிக்கொண்டிருக்கும் ஒருவித தயக்கத்தை எப்படிக் கொண்டுவருவது? ’என் கானம் இன்று அரங்கேறும்’ பாடலில் வார்த்தைகளில் இருக்கும் தயக்கத்தைவிட, இளையராஜாவின் குரலில் ஒளிந்திருக்கும் மாயத்தன்மையே அந்த உணர்வை அதீதமாக உணர்த்துகிறது. இந்தப் பாடலை அவரோடு இணைந்து பாடியவர் ஜென்சி. திரையிசையில் மின்னலாய் தோன்றி மாயமான ஜென்சி மட்டுமே, இந்த படத்தில் ஒலிக்கும் ஒரே பெண்குரல்.  

மடை திறந்து தாவும் நதியலை நான் என்று எழுதிய வைரமுத்து, இந்தப் பாடலையும் எழுதியிருப்பது நிச்சயம் ஆச்சர்யம்தான். வழக்கமாக இதே தொனியிலான பாடல்களை எஸ்.பி.பி, மலேசியா வாசுதேவன் போன்றவர்களின் குரல்களைக் கொண்டு நிரப்பியிருப்பார் ராஜா. இந்த படத்தின் கதாபாத்திரத்துக்கு அந்த தன்மை தேவையில்லை என்று அவர் நினைத்ததே, பாடல்களையும் மீறி கதையிலும் திரைக்கதையிலும் அவர் கொண்டிருந்த அக்கறைக்குச் சான்று.

’கனவில் மிதக்கும் இதயம் முழுதும் புதுராகம் உருவாகும்’ பாடலைப் பாடியிருப்பவர் கே.ஜே.யேசுதாஸ். இந்த பாடல் தொடங்கும்போது வயலின், கிதார் இசை இருவேறுபட்ட நாகங்களாய் ஒன்றன் மீது ஒன்றேற, அதனைத் தொடர்ந்து ஒலிக்கும் அந்த ட்ரம்ஸ் இசை ஒரு கனவுலகத்துக்குள் நம்மை அழைத்துச் செல்லும். அதற்கேற்ப, பாடலின் வரிகள் தொடரும். இந்தப் பாடலின் முடிவில் பாடல் வரிகளை விசிலடிப்பதன் மூலம் நிரப்பியிருப்பார் ராஜா. இந்தப் பாடலின் இசைக்கு நடுவே தனது வார்த்தைகளை நிரப்பியவர் கங்கை அமரன்.

நாயகனின் காதலைப் பற்றிய எண்ணத்தை வெளிப்படுத்தும் பாடலில் கூட, அபஸ்வரம் ஒலிப்பது போலத் தொடங்குவது இளையராஜாவின் அதீத தன்னம்பிக்கைக்கான எடுத்துக்காட்டு. திரைக்கதையை மீறி படத்தின் எந்தப் பாடலும் துருத்திக்கொண்டு ஒலிக்கக்கூடாது என்பதில் அவர் கண்டிப்பாக இருந்தவர் என்பதற்கு இந்தப் பாடலே போதுமானது. ‘காதல் பண்பாடு யோகம் கொண்டாடு’ என்ற வைரமுத்துவின் கைவண்ணத்துக்கு இடையில் வரும் இசையே, அது பல சீரியசான நிகழ்வுகளின் பின்னணிச்சத்தத்தை இடம்பெயர்த்து நிற்பதை உணர முடியும். இந்தப் பாடலை பாடியிருப்பவர் கே.ஜே.யேசுதாஸ். 

courtesy - google god
பாடலின் நடுவே, ’பாடகன் இங்கே மாலைகள் எங்கே தேவதை எங்கே.. சொல்லுங்களேன்..’ என்று நம்மிடம் கேட்பார் கே.ஜே.யேசுதாஸ். அதனையடுத்து சில நொடிகள் மவுனம் இடம்பெறும். பாடலுக்கு எந்த வாத்தியங்களும் இல்லாமல் இசையமைக்க முடியும் என்று அந்த இடத்தில் காட்டியிருப்பார் ராஜா. கண்டிப்பாக, முதல்முறை இயக்குனர் ஆகும் கலைஞர்களுக்கு, இளையராஜாவின் பாடல்களும், அவை இடம்பெறும் திரைக்கதையிலுள்ள காட்சிகளும் நிச்சயம் ஒரு வழிகாட்டும் கையேடுதான்.

மாண்டேஜ் காட்சிகள் போல, இந்தப் படத்தின் பாடல் வரிகள் அனைத்தும் துண்டுதுண்டு கவிதைகளாக இருப்பது திட்டமிட்டு கோர்க்கப்பட்டதா என்று தெரியவில்லை. ஆனால், அதுவே இப்படத்தின் அனைத்துப் பாடல்களுக்கும் மகுடத்தைச் சூட்டுகின்றன. (என்னைப் பொறுத்தவரை..)
இன்று நம் சிந்தனையிலும் செயல்பாட்டிலும் சோகம் என்ற ஒன்றை விலக்க நினைப்பதால்தான், அது நம் வாழ்வின் எல்லா கணங்களிலும் ஒட்டிக்கொள்வதாக நம்புகிறேன். வெற்றியை விரும்பும்போது, தோல்வியைத் தாங்கிக்கொள்ளவும் பழக வேண்டும். அதேபோல, சுகத்தை விரும்பும் எவர் ஒருவரும் சோகத்தையும் எதிர்கொள்ளவும் துணிய வேண்டும். அதற்கான எளிய வழிமுறையே, சோகப்பாடல்களைக் கேட்கும் வழக்கம். சோகத்தை ரசிப்பதனால் மட்டுமே, புதிதுபுதிதாகப் பல சோக நிகழ்வுகள் நம் வாழ்வோடு ஒட்டிக்கொள்ளும் என்பது நிச்சயம் மூடநம்பிக்கையின்றி வேறல்ல. 

courtesy - google god
 திரைக்கதையில் தன் பாடல் இடம்பெறுவதற்கான புதுவித சூழல்களைத் தேர்ந்தெடுத்த இளையராஜாவுக்கு இந்த உண்மை நன்றாகத் தெரியும். அதனால்தான், சுகமான ராகங்களைப் போலவே சோக கீதங்களுக்கும் தந்துள்ளார் நம் மன அலைகளை அமைதிப்படுத்த.. 

பன்முகக் கலைஞரான டி.ராஜேந்தர் இசையத்த படங்களிலும் சோகத்தை வெளிக்காட்டும் பாடல்கள் உண்டு. அதிலிருந்து முற்றிலும் வேறுபட்ட அனுபவத்தைத் தருவது இளையராஜாவின் பாடல்கள். குறிப்பாக, இன்றைய பண்பலை வானொலி அலைவரிசைகளில் ரகசியமாகப் பேசும் ஆர்ஜேக்களுக்கு ‘ஈரவிழி காவியங்கள்’ படத்தின் பாடல்கள் முன்னோடி என்றால் மிகையில்லை!

Apr 22, 2018

இசைவோம்.. இசையாவோம்.. இளையராஜாவினால்..! – 3


Courtesy - Google God

நினைக்கத் தெரிந்த மனமே உனக்கு மறக்கத் தெரியாதா என்பது கவிஞர் கண்ணதாசன் எழுதிய பிரபலமான பாடல். முக்கால் சொச்சம் திரைப்படங்களில் காதலை மட்டுமே பேசுபொருளாகக் கொண்ட 80களில் இந்தப் பாடலைத் படத்தின் தலைப்பாகப் பயன்படுத்தியதில் ஆச்சர்யம் ஏதுமில்லை. கிட்டத்தட்ட ‘ரொமாண்டிக் த்ரில்லர்’ என்ற வகையறாவில், 1987ஆம் ஆண்டு ‘நினைக்கத் தெரிந்த மனமே’ திரைப்படம் வெளியானது. மோகன், ரூபிணி, சந்திரசேகர் உட்படப் பலரும் நடித்த படம் இது.
கதைக்கு மணியன், திரைக்கதை மற்றும் வசனத்துக்கு தினகர், ஒளிப்பதிவுக்கு ராஜராஜன், படத்தின் இயக்குனர் சுரேஷ் என்று இப்படத்தின் தொழில்நுட்பப் பட்டாளம் நீள்கிறது. ஒளிப்பதிவாளர் ராஜராஜன் தவிர மற்றனைவரும் ஓரிரண்டு படங்களோடு தங்களது கவனத்தை வேறுபக்கம் திருப்பியிருக்கக்கூடும். 

Courtesy - GoogleGod
இந்த படத்திற்கு இசையமைத்த இளையராஜா, அனைத்துப் பாடல்களையும் பாடலாசிரியர் காமகோடியானுக்குத் தந்துள்ளார். எல்லா பாடல்களும் எல்லா காலத்துக்குமேற்ற புத்துணர்வோடு இருப்பதும், ’பூவே.. செம்பூவே..’ பாடலைப் போலவே இதிலுள்ள பாடல்கள் அனைத்தும் மேற்கத்திய இசையைக் கேட்ட உணர்வைத் தருவதும் நிச்சயம் ஆச்சர்யம்தான்.  

ஒரு மணி நேரத்திற்குள் சில பாடல்களுக்கு இசையமைக்கும் வரம் பெற்ற இளையராஜா, ஒரே நாளில் இரண்டு அல்லது மூன்று படங்களின் இசை சம்பந்தப்பட்ட பணிகளை நிறைவு செய்து தந்த காலம் ஒன்று உண்டு. இன்று, அதே பணிகளைச் செய்ய பல மாதங்கள் ஆகிறது என்பதே உண்மை. எவ்வளவு வேகமாகப் பணியாற்றியானாலும், பார்த்துப் பார்த்துச் செதுக்கிய சிற்பம் போல இந்தப் படத்தின் ஒவ்வொரு பாடலும் அமைந்திருப்பது நிச்சயம் ஆச்சர்யம் தான். 

Courtesy - GoogleGod
இந்தப் பாடல்களைக் கேட்கும்போதே, அப்போதைய இளைஞர்களின் விருப்பமாக இந்தப்படம் அமைந்திருக்கும் என்பது புரிகிறது. அதற்கேற்ப, படமும் காதலைப் பேசுபொருளாகக் கொண்டுள்ளது. ‘மைக்’ மோகன் என்று கிண்டல் செய்யும் அளவுக்கு பாடல் பாடுபவராகவே பல திரைப்படங்களில் வந்துபோனவர் நடிகர் மோகன். அவரது படத்திற்கு இளையராஜா இசை என்றாலே, எல்லா பாடல்களும் நன்றாக இருக்கும் என்ற கருத்து இசை ரசிகர்களிடையே உண்டு. நினைக்கத் தெரிந்த மனமே பாடல்களும், அதனை 200 சதவீதம் பூர்த்தி செய்கிறது. 

‘சின்னச் சின்ன முத்து நீரிலே தேகம் வண்ண வண்ணக் கோலம் போடுதே’  பாடலைப் பாடியிருக்கின்றனர் கே.ஜே. ஜேசுதாஸ் மற்றும் எஸ்.ஜானகி. இதன் பாடல் வரிகளுக்கு நடுவே வரும் இடையிசையானது, ட்ரம்ஸ், சாக்ஸபோன் என்று ஒவ்வொரு வாத்தியத்துக்குமான ஜுகல் பந்தியைக் கேட்பது போலிருக்கிறது. ஒவ்வொரு படத்திலும் நாயகன் அல்லது நாயகிக்கான தனிப்பாடல் அல்லாது, துள்ளல் ரகத்தில் ஒரு டூயட் பாடல் இடம்பெறுவது அந்த காலத்தில் கட்டாயமாக இருந்தது. (எனது அனுமானிப்பைப் பொறுத்தவரை..) அதனைப் பூர்த்தி செய்யும் விதமாக அமைந்திருக்கும் சின்னச் சின்ன முத்து நீரிலே.. பாடல்.

’எங்கெங்கு நீ சென்ற போதும் என் நெஞ்சமே உன்னைத் தேடும்..’ பாடல் காதலின் திளைப்பில் இருக்கும்போது, ஒருவர் மற்றொருவரிடம் சரணாகதி அடையும் நிலையை விளக்குகிறது. கே.ஜே.ஜேசுதாஸும் சித்ராவும் பாடிய பாடல் இது. மெல்லிசைக் கச்சேரி நடத்துபவர்கள் இளையராஜாவின் பாடல்களைச் சிலாகித்துப் பயன்படுத்துவார்கள். அவர்கள் அதனைப் பயன்படுத்த வேண்டுமென்ற காரணத்திற்காகவே, ஒரு திரைப்படத்தில் சில பாடல்களை இளையராஜா அளிக்கிறாரோ என்ற சந்தேகம் எனக்குள் உண்டு. இந்த படமும் அதனை உறுதி செய்கிறது. பொது இடங்களில் அவர் பாடி வளர்ந்த அனுபவமும் இதன் பின்னிருக்கிறது என்று நம்புகிறேன்.

இதேபோல, இதனைத் தனியாகவும் கே.ஜே.ஜேசுதாஸ் பாடியுள்ளார். டூயட் பாடலை, ஏதேனும் ஒரு பாடகர் அல்லது பாடகியைப் பயன்படுத்தி சோக ரசம் பிழிவதும் இளையராஜாவின் சிறப்புகளில் ஒன்று. இப்படத்தில் அவ்வாறு இருக்கிறதா எனத் தெரியவில்லை. அறிய விரும்புபவர்கள், யூடியுப் தளத்தில் முழுப்படத்தையும் பார்த்து தெரிந்து கொள்ளலாம்.

Courtesy - GoogleGod

‘இளமை ரதத்தில் இயற்கை ரதத்தில்’ பாடல் நாயகிக்கானது. கிட்டத்தட்ட நாயகி அறிமுகப் பாடல் போன்ற சாயலில் படைக்கப்பட்டது. சித்ராவின் குரலில் ஒலிக்கும் இந்த பாடல் மட்டுமே, இந்த ஆல்பத்தில் சுமாரான பாடல் என்று எண்ண வைக்கும். ஆனால் ஓரிரு முறைக்குப் பின்பு, இதுவும் பிடித்துப் போகும்.

‘கண்ணுக்கும் கண்ணுக்கும் மோதல் நெஞ்சத்தை நீ தந்தால் காதல்’ பாடலில், படத்தின் நாயகன் ஒரு புகைப்படக் கலைஞர் என்று உணர்த்தும்விதமாக 'ஸ்மைல் ப்ளீஸ்' என்ற வார்த்தையுடன் தொடங்கும். இன்றைய செல்பி தலைமுறைக்கு இந்த வார்த்தை கண்டிப்பாக ஆறாவது விரல் தான். இந்தப் பாடலைப் பாடியிருப்பவர் கே. ஜே.ஜேசுதாஸ்.
இந்தப் படத்தில் ஜானகி, சித்ரா தவிர மூன்று பாடல்களில் இவர் தான் சாம்ராஜ்யம் நடத்தியுள்ளார் என்பது கவனிப்புக்கு உட்பட வேண்டியது. இளையராஜாவின் இசையில் எல்லா பாடல்களையும் ஜேசுதாஸ் பாடிய வகையிலும் இது முக்கியமான ஆல்பம் ஆகும். 

Courtesy - GoogleGod

ஊட்டி, மழை, ரயில்வே ஸ்டேஷன் என்று இந்த படம் கண்ணுக்கு குளிர்ச்சியாக இருந்தாலும், பாடல்கள் படமாக்கப்பட்டதில் அந்த திருப்தி கிடைக்கவில்லை. இதற்காக, ஒளிப்பதிவாளர் ராஜராஜன் மன்னிக்கக் கடவது. இளைய ராஜாவை நினைக்கும் மனங்களுக்கு இந்த படத்தின் பாடல்கள் என்றும் நினைவில் தெரியும், பார்வை மறைந்த பின்பும் ஆன்மக் கண்ணாடியில் ஒளிரும் பிம்பம் போல...

Apr 8, 2018

இசைவோம்.. இசையாவோம்.. இளையராஜாவினால்! – 2


Courtesy - Google God
முதல் முயற்சி என்பதில் நாம் எப்போதும் மிகுந்த சிரத்தை காட்டுவோம். வெற்றி குறித்த பயத்தையும் பதற்றத்தையும் விட, அந்த முயற்சியின் வீச்சு மிகப்பெரிதாக இருக்கும். அது வெற்றியடையும்போது, எல்லாமே தலைகீழாக மாறும். இரண்டாவது, மூன்றாவது படைப்பை உருவாக்கும்போது, முயற்சியின் மீதான நம்பிக்கையை துருத்திக்கொண்டு நிற்கும் வெற்றி குறித்த பயம். கூடவே வெற்றி மமதையும் தலைக்கு மேலே அங்குமிங்கும் அசைந்தாடும். திரைப்பட இயக்குனரான எவரும் இதற்கு ஆளாகாமல் இருக்க முடியாது. ’மெல்ல பேசுங்கள்’ திரைப்படம் அப்படியான ஒன்று. 
Courtesy - Google God

’பன்னீர் புஷ்பங்கள்’ என்ற திரைப்படத்திற்குப் பிறகு பாரதி – வாசு இயக்கத்தில் வெளியான மூன்றாவது திரைப்படம் இது. இடையே மதுமலர் என்ற படத்தை இருவரும் இயக்கியிருந்தாலும், அதற்கு கங்கை அமரன் இசையமைத்திருந்தார். மெல்ல பேசுங்கள் படத்தில் மீண்டும் இளையராஜாவுடன் இருவரும் கூட்டணி அமைத்திருந்தனர். பருவ வயது காதலைப் படமாக்கிப் பெரும் வெற்றி பெற்றபிறகு, எந்த genreல் படம் செய்வது என்பது ஆகப்பெரும் குழப்பம். 

அதனைக் கடந்துதான், 1983ஆம் ஆண்டு மெல்லப் பேசுங்கள் படமும் உருவாகியிருக்க வேண்டும். இது romantic comedy genre என்று சில இணையதளங்கள் சொல்கின்றன. இப்போதுவரை இந்தப் படத்தைப் பார்க்கவில்லை. ஆனாலும் நிழல்கள், வறுமையின் நிறம் சிகப்பு, புதுமைப்பெண் போன்ற திரைப்படங்களில் சாயலில் இது உருவாகியிருக்கக்கூடும் என்று மனம் சொல்கிறது. காரணம், இதில் இடம்பெற்றுள்ள பாடல்கள். 

Courtesy - Google God
90களில் டிவி சீரியல்களில் வலம்வந்த, சில காலம் சின்னத்திரை நடிகர் சங்கத்தலைவராக இருந்த வசந்த், மெல்ல பேசுங்கள் படத்தில் நாயகனாக நடித்திருப்பார். இந்தப் படத்தின் மூலமாக அறிமுகமான இன்னொருவர் பானுப்ரியா. ஆகச்சிறந்த தமிழ் நடிகைகளுள் ஒருவர். இவர் நன்றாக நடனமும் ஆடுவார் என்பது இன்னொரு சிறப்பு. 
 
முதலிரண்டு படங்களில் சோமசுந்தரேஷ்வர் என்ற ராஜேஷ்வரின் கதை வசனத்தைப் பயன்படுத்திய பாரதி – வாசு, இந்தப் படத்தின் கதைக்கு எம்.எஸ்.மதுவையும், வசனத்துக்கு கலைமணியையும் பயன்படுத்தி இருக்கின்றனர் என்பது குறிப்பிடத்தக்க அம்சம். 50களில் இருக்கும் சிலருக்கு, இது மிகவும் பிடித்த படமாகவும் இருக்கக்கூடும். ஆனாலும், இந்தப் படம் ‘பன்னீர் புஷ்பங்கள்’ அளவுக்கு பெருவெற்றி பெறவில்லை என்பதை யாரும் சொல்லாமலேயே புரிந்துகொள்ள முடிகிறது. காரணம், இதன் பாடல்கள் பெருமளவு கவனத்தைப் பெறாதது தான். 
Courtesy -Twitter
’செவ்வந்திப் பூக்களில் செய்த வீடு வெண்பஞ்சு மேகம் நீ கோலம் போடு’ என்ற பாடல் பெரும்பாலான இசைஞானி ரசிகர்கள் அறிந்த ஒன்று. செவ்வியல் தன்மை கொண்டதாகத் தொடங்கும் இந்தப் பாடல், எந்த இடத்தில் இரண்டு காதலர்களின் உரையாடலைப் போல மாறுகிறது என்பதைக் கணிக்கவே முடியாது. உரையாடல் என்பதற்கு நேரடி அர்த்தம் எடுத்துக்கொள்ளக்கூடாது. தீபன் சக்ரவர்த்தியும் உமா ரமணனும் இந்த பாடலைப் பாடியிருக்கின்றனர்.

‘கேளாதோ காதல் நெஞ்சின் ஓசை கேளாதோ’ என்ற பாடல், 80களின் துள்ளல் இசையை அனைவருக்கும் அறிமுகப்படுத்துகிறது. தனது வழக்கமான பாணியில் இருந்து விலகி, ஒரு தனி ஆல்பத்துக்கான தன்மையுடன் இளையராஜாவின் இந்தப் பாடல் அமைந்திருப்பதாகக் கருதுகிறேன். (இது எனது கருத்து மட்டுமே..) காதலைச் சொல்ல எத்தனிப்பவர்களின் மனநிலையை விளக்க, இது மிகச்சரியான பாடல். இதனைப் பாடியவர் கிருஷ்ணசந்தர் என்று தரவுகள் கிடைக்கின்றன. இவர் பாடிய பிற பாடல்கள் என்னவென்று தெரியவில்லை.

’காதல் சாகாது’ பாடல் வழக்கமான டூயட் பாடல் அல்ல. இதனை முதலில் கேட்கும்போது இருந்த அந்நியத்தன்மை, அடுத்தடுத்த தடவைகளில் காணாமல் போகிறது உண்மை. மலேசியா வாசுதேவனும் ஜானகியும் தங்களது வழக்கமான மேதைமையை இதில் காட்டியிருக்கின்றனர்.

’உயிரே உறவில் கலந்தேன்.. உணர்வில் கலந்தேன்..’ பாடலின் இடையே வரும் தனியிசைக்கும் பாடல் வரிகளோடு சேர்ந்தியங்கும் இசைக்கும் நிரம்ப வித்தியாசம் உண்டு. இவற்றைக் கலந்து ஒன்றிணைப்பதில் தான் இளையராஜா ஜித்தன் என்று நிரூபிக்கிறார். ஒரு வகையில், இது மற்றவர்களின் இசையமைப்பில் அரிதாகவும், இளையராஜாவின் இசையில் எப்போதும் இருக்கும் ஒரு சிறப்பம்சம். அதோடு, சிறு சிறு வாத்தியங்களின் ஒலியையும் ஆங்காங்கே தெளித்து, ஒரு கொலாஜ் எபெக்ட் தருவதில் ராஜா ராஜாதான். இது, எஸ்.ஜானகியின் சோலோ பாடல்.
https://www.youtube.com/watch?v=YpPKJnc4Xr0


Courtesy - Google God
நான்கு பாடல்கள் இந்தப்படத்தில் இருந்தாலும், அதற்கு நா.காமராசன், புலவர் புலமைப்பித்தன், கங்கை அமரன், வைரமுத்து என்று நான்கு பாடலாசிரியர்களைப் பயன்படுத்தியிருக்கிறார் இளையராஜா. ஆனாலும், நாம் இளையராஜா – வைரமுத்து காம்பினேஷனையே புகழ்ந்துகொண்டிருப்பது ஏன் என்று தெரியவில்லை.

சந்தானபாரதியும் வாசுவும் தனித்தனியாகப் பிரிந்து படம் இயக்கச் சென்றதால், நாம் இழந்தது இப்படிப்பட்ட ஹிட் பாடல்கள் கொண்ட ஆல்பங்களையும் தான். அதன்பிறகு வாசுவின் படங்களுக்கு எளிமையிற் சிறந்த பாடல்கள் பல தந்த ராஜா, சந்தானபாரதியின் படப்பாடல்களில் சீரிய முயற்சிகளை மேற்கொண்டிருப்பார். குணா, மகாநதி, சின்ன மாப்ளே, சின்னவாத்தியார் என்று அதற்கு பல உதாரணங்கள் இருக்கிறது.

மேற்கண்ட வார்த்தைகள் சரியா, தவறா என்று இளையராஜாவினால் மட்டுமே பதில் சொல்ல முடியும். ஆனாலும், அது அவரது நினைவின் அடுக்குகளில் இருந்து மேலெழுமா என்று தெரியாது. ஏனென்றால் உதிர்ந்த சிறகுகளை விசிறியடித்துவிட்டு முளைத்தெழும் இளஞ்சிறகுகளால் உயரப் பறப்பதே சாதனைப் பறவைகளின் வழக்கம்!